Samfylkingin

Sækist eftir 1. sæti í prófkjöri Samfylkingarinnar í Reykjavík

— Samfylkingin

Með bréfinu sem hér fer á eftir gerði ég völdum félögum í Samfylkingunni grein fyrir framboði mínu í 1. sæti í prófkjöri flokksins í Reykjavík þann 10. september næstkomandi:

Kæri félagi!

Kjör aldraðra og öryrkja, heilbrigðismálin og húsnæðismál ungu kynslóðarinnar verða kjarnamál í komandi kosningum. Þau eru jafnframt þungamiðjan í stjórnmálaþátttöku minni frá upphafi. Ég hef þess vegna ákveðið að sækjast eftir 1. sæti í prófkjöri Samfylkingarinnar sem fer fram nú fimmtudag til laugardags og leiða þannig annað kjördæmið í Reykjavík.

Ég þakka þann góða stuðning sem ég naut í formannskjöri í vor. Þó öðrum hafi verið falið það vandasama verkefni var mér heiður að hátt í þúsund flokksmenn skyldu vilja treysta mér fyrir því. Nú skiptir miklu að við stöndum öll að baki nýrri forystu því samstaða er lykill að árangri fyrir Samfylkinguna.

Samstaða okkar í stjórnarandstöðunni skapar sterka stöðu og sóknarfæri á nýju kjörtímabili. Hægri stjórnin hefur engum verulegum kerfisbreytingum náð fram og hrökklast nú frá að eigin ósk áður en kjörtímabilinu er lokið. Fjölmörg baráttumál okkar eru líka hugsjónamál annarra í stjórnarandstöðunni og flest sem bendir til að saman getum við náð meirihluta til að gera þau að veruleika.

Ég hef kosið að opna ekki prófkjörsskrifstofu, úthringiver eða annað þess háttar til að gefa nýju fólki svigrúm til að kynna sig og sjónarmið sín, því þó reynsla sé nauðsynleg er nýliðun það líka. Sjálfur bið ég um stuðning þinn til að leiða í fyrsta sinn framboð Samfylkingarinnar í öðru hvoru Reykjavíkurkjördæmanna. Ég heiti þér því að gera allt sem í mínu valdi stendur til að hér taki við stjórn landsins ríkisstjórn um jöfnuð og velferð með aðild okkar.

Bréf þetta sendi ég völdum hópi Samfylkingarfólks. Ég minni okkur á að ítrekað höfum við bætt við okkur á annan tug prósentustiga frá könnunum til kosninga. Aðeins tvö ár eru síðan 32% Reykvíkinga settu x við S. Það var fólkið í Samfylkingunni sem náði þeim árangri með samstilltu átaki.

Með baráttukveðju,

Helgi Hjörvar

Formannskjör í Samfylkingunni

— Samfylkingin
  • Hefst kl. 12 á hádegi laugardaginn 28. maí og stendur til kl. 12 á hádegi föstudaginn 3. júní
  • Allir skráðir félagsmenn geta tekið þátt 
  • Smellið hér til að taka þátt í formannskosningunni
  • Þeir sem vilja ganga til liðs við Samfylkinguna geta skráð sig hér 
  • Til þess að vera á kjörskrá í atkvæðagreiðslunni þarf að skrá sig fyrir kl. 12 á hádegi laugardaginn 7. maí
  • Nánari upplýsingar um formannskjörið má finna á heimasíðu Samfylkingarinnar xs.is
  • Þátttakendur í formannskjörinu fá sent lykilorð í heimabanka og geta þá kosið milli þeirra frambjóðenda sem í kjöri eru. Nú þegar hafa boðið sig fram auk mín Árni Páll Árnason, Guðmundur Ari Sigurjónsson, Magnús Orri Schram og Oddný G. Harðardóttir
  • Hér má sjá bréf mitt til Samfylkingarfólks þar sem ég fór yfir áherslur mínar um breytingar í Samfylkingunni. Sjá einnig myndband og annað nýlegt efni hér á síðunni.

Tilkynning um formannsframboð

— Samfylkingin

Með eftirfarandi bréfi kynnti ég Samfylkingarfólki í síðustu viku formannsframboð mitt:

Kæri félagi,

Samfylkingin þarfnast breytinga. Samfylkingarfólk hefur krafist landsfundar og formannskjörs sem framkvæmdastjórn hefur ákveðið að flýta til vors. Formaðurinn sendi flokksmönnum bréf þar sem hann segir að þessi alvarlega staða hafi skapast á löngum tíma og sé á sameiginlega ábyrgð okkar. Þar er tæpt á mistökum sem við getum verið sammála eða ósammála um í einstökum atriðum en ég fagna því tækifæri sem skapast hefur til opinnar umræðu í flokknum um þessi mál og mörg fleiri.

Mistök eru til þess að læra af. Kreppa stjórnmála og ekki síst okkar jafnaðarmanna er ekki séríslensk þótt hún djúp sé hér. Hún er sprottin af þeirri tilfinningu fólks að peningaöflin ráði, stjórnmálamenn séu í stjórnmálum bara sjálfs sín vegna og flokkarnir svíki gefin loforð.

(meira…)

Valmynd